SARIAYA, Quezon, Philippines - Kulungan ang binagsakan ng isang truck driver makaraang makumpiskahan ng ilegal na droga at baril sa isinagawang anti-drug operation ng mga awtoridad sa Barangay Limbon ng bayang ito kamakalawa.
Kinilala ni P/Lt. Col. William Angway, chief of police dito, ang nadakip na si Ronelito Sacristia alyas “Pody”, 49, may asawa at residente ng Barangay Castanas, Sariaya.
Isinagawa ng joint operatives ng Municipal Drug Enforcement Unit at PDEA sa pamumuno ni Agent William Dulay ang buy-bust operation laban sa suspek dakong alas-5:15 ng hapon. Nang mabili na ng tumayong poseur buyer na pulis ang droga mula sa suspek ay dito na siya inaresto.
Nang kapkapan ang suspek ng mga awtoridad ay nakuha sa kanya ang isang colt caliber 45 at 10 pang pakete ng hinihinalang shabu na nagkakahalaga ng mahigit P30,000.00 at P500 marked money.