Footbridge bumagsak, obrero dedo

MANILA, Philippines — Patay ang isang obrero makaraang bumagsak ang tinutuntungan niyang footbridge na kanilang ginagawa sa Brgy. Bagong, Sablan, Benguet nitong Biyernes. Kinilala ang biktima na si Rafael Calao, 20-anyos, tubong Brgy Labueg, Kapangan, Benguet. Sa ulat ng Cordillera Police, dakong alas-9 ng gabi nang iulat sa pulisya ni Sablan Mayor Arthur Baldo ang insidente. Ayon kay Ruben Pache­ro, 31-taong gulang, contractor, residente ng Brgy. Bagong, Sablan, Benguet, dakong alas-3 ng hapon habang abala ang biktima sa pagtratrabaho sa itinatayong 15-16 metrong taas na footbridge nang biglang bumigay ang sinasandalan nitong poste. Bunga nito, bumulusok ang bik­tima sa lupa na sa kamalasan ay una ang ulo nitong bumagsak at humampas sa matigas na bagay. Nagawa pang maisugod ang biktima sa Benguet General Hospital pero nabigo nang maisalba ang kanyang buhay. (Raymund Catindig)