BULACAN , Philippines — Nasawi ang isa sa riding-in-tandem matapos nila umanong takasan ang police checkpoint sa isang estratihiyang lugar sa Brgy. Camachile, bayan ng Doña Remedios Trinidad ng lalawigan, Biyernes ng madaling araw.
Kasalukuyan pang inaalam ang pagkakakilanlan ng napaslang dahil sa kawalan nito ng identification card. Siya ay nagtamo ng dalawang tama ng bala sa katawan habang nakatakas ang kasamahan na nagsilbing drayber ng kanilang motorsiklo.
Sa ulat, dakong alas-2:30 ng madaling araw habang nagsasagawa ng checkpoint ang pulisya sa isang lugar sa Sitio Maaway, Brgy.Camachile nang ilang sandali ay dumating ang isang dilaw na Yamaha MIO motorcycle na walang plaka habang walang suot na helmet ang dalawang sakay nito. Dito, sumenyas ang mga pulis sa dalawang suspek na tumigil sa checkpoint para sa kaukulang beripikasyon pero sa halip umanong sumunod ay bigla silang humarurot ng takbo na nagbunsod ng habulan. Nang abutan ng mga operatiba, pinilit nilang pinahihinto ang mga suspek pero bumunot umano ang backrider ng armas at pinaputukan ang mga pulis sanhi ng shootout.