MANILA, Philippines — Isang broadcast journalist ang nasawi matapos na tambangan ng apat na lalaki sa Labangaan, Zamboanga del Sur, kamakalawa.
Kinilala ang biktima na si Carlos Matas, host ng Zambo News Patrol sa dxCA Bell Fm at dxBZ Radyo Bagting na nakabase sa Pagadian City.
Sa ulat ng pulisya, si Matas ay tinambangan ng apat na armadong kalalakihan habang sakay ng motorsiklo sa Barangay Nuburan dakong alas-3:30 ng hapon.
Narekober mula sa lugar ang mga basyo ng bala mula sa kalibre 45 baril at 556 M16 rifle.
Nabatid na ito na ang ikalawang beses na tinambangan ang biktima, una ay noong Martes lamang Mayo 8.
Naniniwala naman ang pulisya na may kinalaman sa trabaho ng biktima ang dahilan ng pagpatay.