MANILA, Philippines — Kalunus-lunos na kamatayan ang sinapit ng isang 60-anyos na ama sa kamay ng sarili niyang anak matapos siyang pagtatagain nito makaraan na magtalo habang nag-iinuman sa loob ng kanilang bahay sa Purok 6, Brgy. Pambuhan sa bayan ng Mercedez, Cam Norte kamakalawa ng gabi.
Sinubukan pang isugod ng mga kaanak sa Cam Norte Provincial Hospital sa bayan ng Daet pero idineklarang patay ang biktimang si Efren Hutalla Sr. habang agad namang naaresto ng mga rumespondeng pulis ang suspek na si Fernando Hutalla, 23-anyos pawang residente ng nasabing barangay.
Sa police report na nakarating sa Camp Gen.Simeon Ola, dakong alas-7:30 ng gabi, nag-iinuman ang mag-ama kasama ang ilang kamag-anak at kapitbahay ng biglang magkaroon nang pagtatalo ang dalawa.
Gayunman, sa gitna nang mainit na pagtatalo ng mag-ama biglang kumuha ng tabak ang suspek at pinagtataga sa ibat ibang bahagi ng katawan ang kanyang tatay dahilan para mamatay noon din.
Sinampahan nang kasong parricide ang suspek na labis ang pagsisisi sa nagawang pamamaslang sa sariling ama.