COTABATO CITY, Maguindanao, Philippines - Dalawa-katao na sinasabing notoryus na karnaper ang bumulagta makaraang kumasa at makipagbarilan sa mga pulis sa panulukan ng Barangay Kenram sa bayan ng Isulan, Sultan Kudarat kahapon ng umaga. Sa ulat na nakarating kay P/Senior Supt. Raul Supiter, provincial director ng Sultan Kudarat police, tinangay ng mga suspek ang motorsiklo ng biktimang si Florencio Vivencio Jr. sa kahabaan ng national highway sa Brgy. Dansuli sa nasabing bayan. Mabilis na nagreklamo ang biktima sa kinauukulang ahensya ng pamahalaan kaya naglatag ng checkpoint at namatay ang dalawa sa shootout. Narekober sa crime scene ang isang granada, cal .45 pistol, 2 bala, 2 plastic sachet na shabu at ang motorsiklo ng biktima. Sa ngayon inaalam pa ng pulisya ang pagkakakilanlan ng dalawa na sinasabing mga nakatira sa Maguindanao.