COTABATO CITY, Magiundanao, Philippines - Napatay ang sinasabing lider ng Abu Sayyaf Kidnap-for-Ransom Group makaraang makasagupa ang pangkat ng PNP Special Action Force sa liblib na bahagi ng Sitio Tarlah, Barangay Tampalan sa bayan ng Alicia, Zamboanga Sibugay kahapon ng madaling araw.
Kinilala ang napatay na si Imam Yasin habang nasugatan naman ang dalawa nitong tauhan na sina Murad Mohamad at Aujaie Moh Abdulkarim.
Isa namang pulis na si PO2 Larry Palidnang ng PNP-SAF trooper ang sugatang isinugod sa pagamutan.
Sa ulat ng Police Regional Office 9, nagsasagawa ng operasyon ang elite force ng 84th PNP-SAF nang masabat ang grupo ni Yasin na humantong sa bakbakan.
Nabatid na ang 84th PNP-SAF Company ang nakapatay sa international terrorist na si Zulkipli “Marwan” bin Hir sa madugong Oplan Exodus sa Mamasapano, Maguindanao noong Enero 25, 2015 kung saan naging kapalit nito ang buhay ng 44 SAF Commandos.
Narekober sa encounter site ang isang M14 rifle, isang cellphone at mga dokumento ng ekstremistang grupo.