MANILA, Philippines - Brutal na kamatayan ang sinapit ng 54-anyos na ama matapos itong pugutan ng sariling anak na pinaniniwalaang sinapian ng masamang espiritu sa bayan ng Tungawan, Zamboanga Sibugay kamakalawa.
Kinilala ang biktima na si Nonino Apolinario, magsasaka habang patuloy namang pinaghahanap ang suspek na si Peter Apolinario, 31.
Base sa police report na nakarating sa Camp Crame, naganap ang krimen sa bahay ng biktima sa Brgy. San Vicente bandang alas-7 ng umaga.
Ayon sa imbestigasyon, bago ang krimen ay nagkaroon ng matinding pagtatalo ang mag-ama kung saan ilang oras ang nakalipas ay kumuha ng bagong hasang itak ang suspek saka pinagtataga ang kanyang ama.
Hindi pa nakuntento ang suspek ay tuluyang pinugutan ang ama.
Nabatid na tinawag pa ng suspek ang kaniyang bayaw at sinabing pinatay na niya ang ama saka mabilis itong tumakas.
Natagpuan sa crime scene ang pugot na ulo ng biktima na nasa tabi nito kung saan inaalam ng pulisya kung lango sa droga ang suspek.