BULACAN, Philippines - Bumulagta ang notoryus na drug peddler matapos itong makipagbarilan sa arresting team ng pulisya habang isa naman ang naaresto sa inilatag na operasyon sa San Jose Del Monte City, Bulacan kahapon ng madaling araw. Kinilala ang napatay na si Abdul Minalang habang arestado naman ang kasamahan nitong si Fred Borja na nasa watchlist ng pulisya bilang drug pusher. Bandang alas- 4 ng madaling araw nang salakayin ng mga tauhan ng San Jose del Monte City PNP, Regional Public Safety Batallion, Provincial Public Safety Company at ng Army’s 4th Infantry Battalion ang Barangay Sta. Cruz 1 ang pinagkukutaan ng mga drug pusher. May 11 search warrants ang pulisya laban sa grupo ng mga drug pusher kabilang si Minalang. Nasamsam kay Borja ang cal. 38 revolver, dalawang pen gun, mga pinatuyong dahon ng marijuana at mga drug paraphernalia.