BULACAN, Philippines – Isang Indian national na may negosyong pagpapautang ang nasawi matapos na tambangan ng motorcycle riding in tandem sa Brgy. Sta. Rosa 1, Marilao, Bulacan kahapon ng umaga. Pitong tama ng bala ang tinamo ng biktima na si Vifan Bhatti, 32, tubong Punjabi, India at residente ng Brgy. Bunlo, Bocaue. Sa ulat ni PO3 Marcelo Galsim, alas-6:30 ng umaga habang binabagtas ng biktima ang kahabaan ng Raymundo St., Brgy. Sta. Rosa 1 patungo sa Northville 4, Brgy. Lambakin lulan ng pag-aaring motorsiklong Honda Wave (OO-4317) upang maningil ng mga pautang nang bigla siyang habulin ng isa pang motorsiklo lulan ang mga suspek. Nang matapatan, agad na pinaputukan ng sunud-sunod ang biktima. Narekober sa crime scene ang pitong basyo ng 9mm kalibre na baril habang nawawala ang nakolektang pera nito.