Bomb expert utas sa shootout
MANILA, Philippines - Napaslang ang sinasabing notoryus na bomber ng Abu Sayyaf Group matapos itong makipagbarilan sa mga operatiba ng pulisya sa Sitio Tinambacan, Barangay Maganda sa Lamitan City, Basilan noong Martes ng gabi.
Kinilala ni P/Senior Insp. Gean Gallardo, hepe ng Lamitan City PNP ang napatay na si Jabier Pinglias wanted na bomb expert ng Sayyaf at kabilang sa grupong urban terrorist.
Base sa ulat ng pulisya na nakarating sa Camp Crame, isisilbi sana ng pinagsanib puwersa ng Lamitan City PNP, Basilan Provincial Public Safety Company at Regional Public Safety Battalion ang warrant of arrest laban kay Pinglias nang sumiklab ang bakbakan bandang alas-7:20 ng gabi.
Si Pinglias na bomb expert ay nahaharap sa mga kasong carnapping, pagpatay at pagtutulak ng droga.
Samantala, lumilitaw din sa imbestigasyon na sangkot si Pinglias sa pambobomba sa Lamitan Port Terminal sa Barangay Kulay Bato noong Lunes.
Nagpapatuloy naman ang pagtugis sa mga kasamahan ni Pinglias na sangkot sa paghahasik ng terorismo sa nasabing lalawigan at karatig pook.
- Latest
