TUGUEGARAO CITY, Philippines – Sabog ang mukha ng isang 36-anyos na magsasaka nang ito ay barilin ng shotgun ng napikon na kainuman matapos mapag-sabihang malaki ang tiyan at matakaw pa sa pulutan naganap kamakalawa sa Barangay Unag, Amulung, Cagayan. Sinabi ni Sr. Insp. Geronimo Balloran, hepe ng PNP Amulung na napagbalingan lang ng init ng ulo ng suspek na si Juliano Alfonso, 45 ang kainumang kapitbahay na si Arnel Balinuyos nang hindi nadatnan ang target nitong si Marcial Cabbab. Lumalabas sa imbestigasyon, dakong alas-3:45 ng hapon ay nainsulto si Alfonso matapos punahin ni Cabbab ang malaki nitong tiyan at matakaw sa pulutan habang nag-iinuman silang magkakapitbahay. Galit na umuwi ang suspek sa bahay at ilang minuto ay bumalik sa inuman dala ang isang shotgun, subalit hindi nadatnan si Cabbab at sa matinding galit ay napagbalingan nito ang biktima na binaril sa mukha.