MANILA, Philippines – Patay ang isang negosyanteng Filipino-Chinese na nagmamay-ari ng isang hardware store matapos tambangang at pagbabarilin ng motorcycle riding in tandem na mga armadong salarin sa downtown ng Zamboanga City nitong Biyernes .
Namatay habang ginagamot sa Zamboanga City Medical Center ang biktima na si Philip Jacinto Lim, may-ari ng Unicon Enterprises, sanhi ng dalawang tama ng bala sa ulo at katawan.
Ayon kay Zamboanga City Police Spokesperson C/Insp. Joel Tuttuh, dakong alas-7 ng umaga habang patungo sa kanyang hardware store lulan ng motorsiklo ang biktima nang tambangan ng hindi kilalang mga salarin na magkaangkas sa motorsiklo sa panulukan ng Budget Wise Supermarket sa kahabaan ng Campaner Street ng lungsod. Matapos ang krimen, tumakas ang mga suspek at narekober ng mga nagrespondeng pulis sa lugar ang mga basyo ng bala ng cal. 45 .