MANILA, Philippines – Patay ang 11-anyos na totoy matapos itong makalunok ng lizard fish habang nangingisda kasama ang kanyang mga kaibigan sa dalampasigan ng Barangay Bogo sa bayan ng Maria, Siquijor noong Linggo ng hapon.
Naisugod naman sa Maria Health Center subalit hindi na umabot ng buhay ang biktimang si Jeck Ian Carillo.
Sa ulat ni PO2 Jay Duhaylungsod ng Siquijor Provincial Police Office, nangingisda ang biktima kasama ang mga kaibigan nang makahuli ito ng lizard fish sa pamamagitan ng sibat.
Gayon pa man, kinagat nito sa ulo ang nasabing isda subalit aksidenteng nalulon at bumara sa lalamunan.
Tinangka naman ng mga kaibigan na hilahin ang isda sa bibig ng biktima subalit masyadong madulas kaya isinugod sa health center kung saan hindi na umabot ng buhay.
Nabatid na nangingisda ang biktima para tulungan ang kanyang mga magulang sa araw-araw na pangkain. Freeman News Service