Dalaga hindi naghubad, bosero nagwala

MANILA, Philippines - Pinaniniwalaang nabitin ang isang bosero matapos nitong pagsusuntukin ang isang dalaga na  kanyang binobosohan sa banyo  matapos na hindi ito nag­hubad bagkus ay naglaba lang ng panty naganap ka­makalawa sa Brgy. Tuquib, Villaviciosa, Abra.

Kinilala ang biktima na si Mary Angeline Pe Ablan, 23,  ng Community Empowerment Foundation (CEF) Kalahi at residente ng Brgy.Tuquib,Villaviciosa.

Arestado naman ng nagrespondeng barangay tanod ang suspek na si Rodel Borce, 30, magsasaka.

Sa ulat ng Cordillera Police, bago ang panggugulpi ng suspek sa biktima dakong alas-11:00 ng gabi ay  pumasok sa banyo ang dalaga upang maglaba ng kaniyang panty  na lingid sa kaalaman ay nasa kisame ang suspek at namboboso.

Dahil sa naglaba lang ang dalaga at hindi naligo ay nagalit ang suspek kaya’t lumundag ito mula sa kisame at pinagsusuntok sa mukha ang dalaga na tinangka pa nitong pagta­tagain na mabuti na lamang na nakatakbo palabas ng banyo.

Nagawa namang ma­ka­pagtago ng dalaga na hu­mi­ngi ng tulong sa kanilang mga kapitbahay habang mabilis na tumakas ang suspek.

Nasakote naman ang suspek sa follow-up operations ng mga otoridad na pinaniniwalang nabitin sa dalaga.