CAMP JULIAN OLIVAS, Pampanga, Philippines – Kalaboso ang binagsakan ng sampung drug courier sa isinagawang drug bust operation ng mga tauhan ng Criminal Investigation and Detection Group, PDEA-Region 3, at pulisya sa Barangay Dau sa Mabalacat City, Pampanga noong Huwebes. Sa police report na nakarating kay P/Chief Supt. Rudy Lacadin, PNP regional director, kinilala ang mga suspek na sina Espher “Mudra” Tanglao, 53; Aries Tanglao, 30; Analyn Tanglao, 26; Fe Dantes, 35; Rosanna “Susan” Basilio, 39; Ernesto Ronquillo, 50; Vincent Paul Manas, 26; Jake Sison, 38; Peterson Feliciano, 29; at si David Hernan Hipolito, 30. Sa bisa ng search warrant na ipinalabas ni Judge Omar T. Viola ng Angeles City Regional Trial Court Branch 57 sinalakay ang isang bahay na ginagawang drug den ng mga suspek. Nasamsam sa mga suspek ang 15-gramo ng shabu at mga drug pharapernalia.