Lolo dinedo ni lola dahil sa selos

LEGAZPI CITY, Albay, Philippines – Matinding selos ang isa sa motibo kaya napatay ng 68-anyos na lola ang kanyang asawang 78-anyos matapos nitong hatawin ng kahoy sa ulo sa kanilang bahay sa Barangay Salvacion, bayan ng Magallanes, Sorsogon kamakalawa ng hapon. Halos mabasag ang bao ng ulo ng biktimang si Melchor Rosin habang nasakote naman ang lola na si Carmin Rosin na kapwa nakatira sa nasabing barangay. Sa inisyal na ulat ng pulisya, lumitaw na may nakarating na tsismis sa suspek kaugnay sa nililigawan ng biktima ang isang biyuda na nakatira sa kabilang barangay. Kaagad na kinompronta ng suspek ang kanyang mister kung saan itinanggi naman ito ng lolo na humantong sa matinding sigawan. Dito na nagalit ang suspek kung saan hinataw nito sa ulo ang kanyang asawa na nagkikisay naman at namatay.