TUGUEGARAO CITY, Cagayan, Philippines – Dalawa-katao ang namatay habang kritikal naman ang 66-anyos na lolo sa naganap na magkahiwalay na sakuna sa bayan ng Sto. Domingo, Ilocos Sur at bayan ng Sta. Maria, Isabela kamakalawa. ?
Sa ulat na nakarating kay P/Senior Insp. Edgardo Medrano, hepe ng Sto. Domingo PNP, kinilala ang mga namatay na sina Robert Molina, 26; at Jackson Quines, 22, mga basketball varsity team player sa bayan ng Masingal, Ilocos Sur.
Nabatid na nag-overtake ang motorsiklo ng dalawa sa sinusundang sasakyan kaya sumalpok sa kasalubong na pampasaherong bus na minamaneho ni Glen Burgos. Sumuko naman sa pulisya ang driver ng bus.
Samantala, nagkabali-bali ang buto ni Marcos Canceran matapos mahagip ng pampasaherong GMW bus ang kanyang motorsiklo sa kahabaan ng highway sa Barangay Naganacan sa bayan ng Sta. Maria, Isabela.
Ayon kay P/Senior Insp. Jeffrey Raposas, hepe ng Sta. Maria PNP, iniwan na lamang ng driver ng bus ang biktimang nasa kritikal na kalagayan.