MANILA, Philippines - Bagsak-kalaboso ang 30-anyos na ama matapos nitong pagmalupitan ang dalawa nitong anak na pinapatakan ng tulo ng kandila sa iba’t-ibang bahagi ng katawan dahil sinasapian umano ng masamang espiritu sa bayan ng Lucban, Quezon kamakalawa ng umaga.
Sa ulat ng Quezon PNP na isinumite sa Camp Crame, itinago sa mga pangalang Kiko, 3; at Len- Len, 1, kapwa na-trauma sa insidente.
Nahaharap ngayon sa kasong paglabag sa Republic 7610 (Child Abuse Act) ang suspek na ipinatago sa pangalang Lito upang protektahan ang kanilang pamilya.
Ayon sa pulisya, naglalaro ang magkapatid nang akalain umano ng suspek na sinasapian ng masamang espiritu kung saan ikinulong nito sa kuwarto saka pinapatakan ng tulo ng may sinding kandila sa iba’t-ibang bahagi ng katawan.
Dahil dito ay nagsisigaw ang dalawa na narinig pa ng kanilang mga kapitbahay kung saan napilitan ang mga itong sumilip sa bahay ng mag-aama upang makita ang pangmamaltrato ng suspek sa kaniyang mga anak.
Mabilis namang ipinagbigay-alam sa pulisya ang pangyayari kaya inaresto ang suspek.