QUEZON, Philippines – Pinagtataga hanggang sa mamatay ang mag-asawang magsasaka makaraang mairita ang kanilang manugang na lalaki dahil sa panenermon kamakalawa ng gabi sa Purok 4, Barangay Villa Reyes sa bayan ng San Narciso, Quezon.
Nagmistulang kinatay na karne ng hayop ang katawan ng mag asawang Absalon Dumos, 63; at Teresita Dumos, 62, habang tinutugis naman ng pulisya ang 40-anyos na suspek na si Henry Arcenas.
Sa imbestigasyon ng pulisya, bandang alas-9:30 ng gabi nang pagtatagain ng suspek na senglot ang mag-asawa na magkatabing natutulog sa loob ng kubo.
Tumakas naman ang suspek lulan ng motorsiklo na nagtungo sa bulubunduking bahagi ng nasabing barangay.
Nabatid na noong nakalipas na linggo ay sinermonan ng mag-asawa ang suspek dahil sa paulit-ulit nitong pananakit sa kanilang anak na babae.
Pinaniniwalaang nagtanim ng panibugho ang suspek kaya isinagawa ang brutal na pamamaslang.