MANILA, Philippines – Patay ang isang mister habang tatlo nitong angkas ang nasugatan matapos na salpukin sila ng van sa highway ng Brgy. Cabaluy, Zamboanga City kamakalawa.
Ang nasawi ay kinilalang si Junaide Ade, 30 residente ng Brgy. Lanzones. Habang dinala sa Zamboanga City Medical ang mga sugatang angkas na sina Jodelyn Camins; Jas Owens Camins, 3; at Francesca Reign Ade, 4.
Sa ulat bandang alas-12:00 ng tanghali sa kahabaan ng national highway ng Brgy. Cabaluy kasalukuyang lulan ang mga biktima ng motorsiklo na minamaneho ni Junaide nang salpukin sila ng kasalubong na van (XNX-640) na minamaneho ni Rogemer Cubol.
Sa lakas nang pagkakabangga ay agad namatay si Junaide habang nagtamo naman ng mga sugat sa iba’t ibang bahagi ng katawan ang mga backriders nito.