BATANGAS, Philippines – Nilamon ng apoy ang dalawang lola makaraang makulong sa loob ng nasusunog nilang bahay sa Barangay Cahigam, bayan ng Rosario, Batangas kahapon ng madaling araw. Kinilala ang mga biktima na sina Librada Lucero, 82; at Aurea Balilia, 86, kapwa nakatira sa nasabing barangay. Bandang alas-12:30 ng madaling araw ng magsimula ang sunog habang mahimbing na natutulog ang dalawang matanda. Nagmula ang apoy sa kusina ng dalawang matanda na gawa sa kahoy na mabilis na kumalat at tumupok sa kanilang bahay. Pasado alauna y medya nang maideklara ng mga bumbero na fire out na ang sunog hanggang tumambad sa kanila ang bangkay ng dalawang matanda. Inaalam naman ng mga imbestigador ang pinagmulan ng apoy sa kusina ng mga lola. Arnell Ozaeta