CAVITE, Philippines – Bulagta ang bagitong holdaper na nanloob sa tindahan ng ukay-ukay matapos itong makipagbarilan sa pulisya kamakalawa ng hapon sa Dasmariñas City, Cavite. Kasalukuyang bineberipika ang pagkakakilanlan ng holdaper na napatay sa loob ng tindahan sa kahabaan ng Aguinaldo Highway sa Zone 4 sa nabanggit na lungsod. Sa police report na nakarating sa Camp Pantaleon Garcia sa Imus City, Pinasok ng gunman ang tindahan saka tinutukan ng baril ang nangangasiwa saka nilimas ang pera kung saan nagkagulo naman ang mga namimili. Namataan naman ng mga pulis ang holdaper na papatakas kaya tinangkang sitahin subalit nanlaban ito kaya napatay. Narekober naman ng pulisya ang ginamit na cal. 38 revolver at ilang basyo ng bala.