MANILA, Philippines – Umaabot sa lima-katao kabilang ang isang balikbayang seaman ang namatay makaraang magbanggaan ang kotse at kasalubong na prime mover truck na may hilang trailer sa kahabaan ng South Coastal Road sa Cebu City kamakalawa ng madaling araw.
Kabilang sa mga namatay ay sina Rustico Bas, 48, seaman; Oscar Oneo, Rosete Capala, 45; Alma Basalo, at pinsan nitong si Gwendolyn Basalo na pawang 20-anyos.
Sa ulat ng Cebu City Traffic Operations Management, ang mga biktimang lulan ng kotseng may plakang 7AT-138 756 ay patungong Talisay City mula sa Cebu City nang makasalpukan ang prime mover na may hilang trailer (GDG 400) dakong alas-3:44 ng madaling araw.
Nabatid na si Bas ay kababalik lamang sa Cebu City noong nakalipas na linggo mula sa Estados Unidos.
Napag-alamang dadalhin sana ng prime mover na minamaneho ni Danilo Cojo ang kargamentong 700 sako ng semento sa Cebu City mula sa Naga City nang maganap ang trahedya.
Sa imbestigasyon ng pulisya, hindi napansin ni Cojo ang paparating na kotse ng mga biktima kaya nasalpok nito kung saan nakaladkad pa ng 92 metro ang kotse ng mga biktima.
Bagsak kalaboso naman si Cojo na ngayon ay nahaharap sa kasong reckless imprudence resulting to multiple homicide.