MANILA, Philippines – Pinaniwalaang matinding selos ang nagbunsod sa isang mister matapos nitong umano’y patayin sa taga ang textmate ng kaniyang live-in partner ng mabuking ang pangangaliwa ng dalawa sa Sitio Salvacion, Brgy. Buensuceso, Gumaca, Quezon kamakalawa ng gabi.
Halos mabiyak ang ulo at maputol ang kamay sa tinamong mga taga sa iba’t-ibang bahagi ng katawan ang biktimang si Ramon Hong III.
Sa ulat ng pulisya, dakong alas-10:30 ng gabi ay kinompronta ng suspek na itinago sa pangalang Bong ang kaniyang live-in partner na ipinatago naman ng pamilya sa pangalang Lea matapos na mabasa sa cell phone ng babae ang pakikipagpalitan umano nito ng text sa biktima.
Sa matinding galit ng suspek ay sinugod umano ang bahay ng biktima at ng lumabas ito ay doon na sinalubong ng sunud-sunod na taga.
Gayunman, wala naman ni isa sa mga kapitbahay ng biktima ang maglakas loob na tumestigo sa krimen.
Patuloy ang masusing imbestigasyon ng pulisya sa kasong ito upang mabigyang linaw ang insidente.