MANILA, Philippines - Brutal na kamatayan ang sinapit ng 37-anyos na mister matapos ratratin ay pinagtataga pa ng dalawang anak ng kalaguyo ng una sa Barangay Cawit, Zamboanga City sa Zamboanga del Sur kamakalawa ng gabi.
Kinilala ang napatay na si Ronan Punzalan habang pinaghahanap naman ng pulisya ang mag-utol na suspek na sina Tan Saric, 25; at ang 17 anyos nitong kapatid na itinago sa pangalang Sam.
Sa imbestigasyon, pauwi na ang biktima mula sa pakikipagtagpo sa 42-anyos na ina ng mga suspek na si Fatima Saric nang maabutan ng mag-utol habang palabas ng bakuran ng kanilang bahay.
Dito na sumiklab ang galit ng magkapatid kung saan pinagbabaril ito ni Tan pero tumakbo sa loob ng kanilang bahay na nakorner naman ni Sam saka pinagtataga naman ito.
Upang makasigurong patay na ang biktima ay muli itong pinaputukan ni Saric at pinagtataga naman ni Sam.
Narekober sa pinangyarihan ng krimen ang siyam na basyo ng bala ng baril, at apat na sachet ng shabu. Joy Cantos