Magsasaka pinatay sa gulpi

NUEVA ECIJA, Philippines – Pinagtulungang gulpihin hanggang sa mapatay ang 42-anyos na magsasaka ng dalawang kainuman matapos magkapikunan sa masamang biro noong Miyerkules ng gabi sa Purok Camachile, Barangay Gabaldon sa Muñoz City, Nueva Ecija. Narekober sa Gabaldon River ang bangkay ng biktimang si Arthuro Noveda habang pinaghahanap ng pulisya ang dalawang suspek na sina Felix Ramento at Erick Santos na kapwa nakatira sa nasabing barangay. Sa imbestigasyon ng pulisya, magkasamang nag-iinuman ang biktima at dalawang suspek nang magkapikunan sa masamang biruan hanggang sa mauwi sa pamamaslang. Kinaladkad pa ng mga suspek ang katawan ng biktima saka itinapon sa ilog. Nasaksihan naman ng magpinsan ang ginawang pamamaslang sa biktima kaya kaagad na naipaabot sa pulisya.