QUEZON, Philippines – Hindi umubra ang pagiging matikas ng isang magsasaka matapos na pagtulungang saksakin at mapatay ng mag-utol kaugnay sa pinag-agawang babae sa sayawan kamakalawa ng gabi sa Barangay Pagsangahan, bayan ng San Francisco, Quezon. Kinilala ng pulisya ang biktima na si Nomeriano Diaz ng Barangay Nasalaan habang nadakip naman ang mag-utol na suspek na sina Renante Dauba, 44; at Danny Dauba na kapwa nakatira sa nasabing barangay. Base sa ulat ng pulisya, nanonood ng pasayaw sa barangay fiesta ang biktima at ang mag-utol nang sumiklab ang pagtatalo. Nagkainitan ang biktima at si Renante dahil sa babae na kapwa nila gustong isayaw. Nang hindi magkasundo ay naghamunan ang dalawa kung saan armado ng patalim ang biktima at si Renante naman ay tubo. Nang makita ni Danny na agrabyado ang kapatid ay inundayan nito ng saksak sa likuran ang biktima at tumulong na rin ang kapatid hanggang sa maganap ang pamamaslang.