LEGAZPI CITY, Albay, Philippines – Bulagta ang 42-anyos na miyembro ng Bureau of Jail Management and Penology matapos pumutok ang baril na kanyang nililinis sa kanilang bahay sa Purok Acacia, Barangay Nursery sa Masbate City, Masbate kahapon ng madaling araw.
Hindi na naisalba sa Masbate Provincial Hospital ang buhay ni SJO1 Ferdinand Fuentes na nakatalaga sa bayan ng San Jacinto, Masbate.
Sa inisyal na ulat ng pulisya, maagang magising ang mag-asawang Fuentes para sa kani-kanilang trabaho kung saan naunang lumabas ng kuwarto ang misis para maghanda ng almusal.
Gayon pa man, biglang umalingawngaw ang malakas na putok ng baril na nagmula sa kuwarto ng mag-asawang Fuentes.
Kaagad na inusisa ng misis ang kanilang kuwarto kung saan bumulaga sa kanya ang duguang biktimang nakahandusay sa sahig.
Nabatid na bago lumabas ng kuwarto ang misis ay namataan nito na naglilinis ng baril ang kanyang mister kung san pinaniniwalaang pumutok at tumama sa ulo ng biktima.
Isinailalim naman sa paraffin test examination ang misis upang mabatid na walang naganap na foul play sa pagkamatay ng biktima.