MANILA, Philippines – Lima-katao kabilang ang isang pulis ang nasugatan makaraang suwagin ng nagwawalang kalabaw na nakatakda na sanang katayin sa Barangay Putik, Zamboanga City, Zamboanga del Sur noong bisperas ng Bagong Taon.
Naisugod sa Zamboanga Peninsula Medical Center ang mga sugatang sina SPO1 Sylvia Dicen, Gian Ozzy Romo, 6; Joseph Pulad, 34; Sarah Jean Seballos, 20; at si Shikenah Tueres,15, pawang nakatira sa nasabing barangay.
Lumilitaw sa imbestigasyon na nakatakda na sanang katayin ang kalabaw na pag-aari ni Barangay Kagawad Nolia para sa pagsalubong sa Bagong Taon ng magwala ito sa kahabaan ng Gutierrez Drive bandang alas-9:30 ng umaga.
Tiyempo namang napadaan sa nasabing lugar si SPO1 Dicen kaya sinusuwag ng kalabaw kung san nadamay ang iba pang biktima.
Naalarma naman ang mga residente kaya pinagtulungang hulihin bagama’t ilan sa mga ito ay nagtamo ng sugat at galos.