2 minero dinedo ng kabaro

LEGAZPI CITY, Albay, Philippines – Pinaniniwalaang alitan sa pagmimina ang isa sa motibo kaya pinagbabaril hanggang sa mapatay ang dalawang minero ng kanilang kabarong minero sa Sitio Maning, Barangay Casalugan sa bayan ng Paracale, Camarines Norte kamakalawa ng umaga. Kinilala ni P/Chief Insp. Rommel Labarro ang mga biktima na sina Gregorio Nicodemos, 57; Niño Nicodemos, 21, mga nakatira sa Barangay Dalnac. Sugatan naman si Bayani Inalisan, 51, ng Barangay Malacbang habang nakaligtas naman kay kamatayan si Chris Nicodemos, 27. Pinaghahanap naman ng pulisya ang mga suspek na sina Mark Anthony Villaflores, 30; at Louie Vergara, 24, mga nakatira sa Purok 6 , Barangay Parang, bayan ng Jose Panganiban, Camarines Norte. Base sa ulat na nakarating kay P/Chief Supt. Victor Deona, naganap ang pamamaslang habang ang mga biktima ay nasa minahan bandang alas-7:30 ng umaga.