MANILA, Philippines - Nakaratay sa pagamutan ang 48 elementary pupils matapos na malason sa kinaing cassava balls sa kantina ng kanilang eskuwelahan sa Don Marcelino, Davao Oriental kamakalawa.
Ayon sa pulisya, naganap ang insidente sa Jose Villanueva Elementary School sa nasabing bayan dakong alas-10:05 ng umaga matapos na bumili ang mga batang nasa edad 6-12-anyos ng kanilang meryenda.
Gayunman, matapos makain ang ‘cassava balls’ ilang sandali pa ay nagsimula ng mamilipit sa matinding sakit ng tiyan, dumanas ng matinding pagkahilo, pananakit ng ulo at pagsusuka ang mga biktima kaya naman agad na isinugod ang mga ito sa pagamutan.
Sa pagsusuri ng mga health officials, nabatid na hinaluan ang bagong lutong cassava balls ng panis na lumilitaw na siyang nakalason sa mga kabataang estudyante. Inaalam na ang pananagutan ng cook at ng may-ari ng nasabing canteen sa naganap na insidente.