CAMARINES NORTE, Philippines – Pinaniniwalaang hinalay muna saka pinatay sa sakal ng di-kilalang lalaki na sinasabing adik sa bawal na droga ang 8-anyos sa Barangay Gaboc, bayan ng Mercedes, Camarines Norte noong Sabado. Natagpuan sa mababaw na hukay na may tubig ang bangkay ni Nica Atencia, Grade 1 pupil sa Gaboc Elementary School at nakatira sa Purok 5 sa nasabing barangay. Base sa ulat ng pulisya, noong Huwebes ng hapon ay hindi na nakauwi ang biktima mula sa nabanggit na eskuwelahan kaya pinaghahanap na ng mga magulang. Isang residente ang nakakita sa bangkay ng biktima na palutang-lutang sa mababaw na hukay na may tubig kaya ipinaabot sa pulisya.