LEGAZPI CITY, Albay, Philippines – Nasa malubhang kalagayan ang isang 53-anyos na mister matapos na manlaban sa dalawang lalaki na naaktuhang nagnanakaw ng makina ng kanyang traktora sa Zopne 7, Barangay San Antonio, Nabua, Camarines Sur kahapon ng madaling-araw.
Kasalukuyang ginagamot sa Rinconada Medical Center ang biktima na kinilalang si Lodinilo Nuarin, magsasaka at residente ng naturang lugar.
Sa ulat ng pulisya, dakong alas-2:30 ng madaling-araw nang magising ang biktima at makarinig ito ng ingay sa labas ng kanyang bahay. Dito, agad siyang lumabas at nakita nito ang dalawang hindi kilalang mga suspek na ninanakaw ang makina ng Yanmar NS50 na nakakabit sa kanyang traktora.
Tinangkang manlaban ng biktima sa dalawang suspek subalit bigla na lamang siyang pagbabarilin. Nang bumulagta, mabilis na tumakas papalayo sa lugar ang mga suspek.
Kaagad naman na nagising ang pamilya ng biktima at isinugod siya sa pagamutan upang malapatan ng lunas ang tinamo nitong tama ng bala sa katawan.