BULACAN, Philippines – Pinabulagta ang 42-anyos na miyembro ng Akyat-Bahay Gang matapos itong pagbabarilin ng mga di-kilalang kalalakihan sa madamong bahagi ng Barangay Gaya-Gaya, San Jose Del Monte City, Bulacan kahapon ng umaga.
Kinilala ng pulisya ang biktima na si Rolando “Bulag” Fulgado ng Barangay Bagong Silang sa Caloocan City.
Ayon kay PO3 Edward Israel, natagpuan ang bangkay ng biktima sa madamong bahagi kung saan may mga tama ng bala ng cal. 45 pistol at shotgun.
Sa tala ng pulisya, ang biktima ay isinasangkot sa serye ng nakawan sa nabanggit na bayan kung saan pinaniniwalaang onsehan sa partihan ng nakulimbat na mga kagamitan ang isa sa motibo kaya pinatay ito ng kanyang mga kabaro.