MANILA, Philippines – Napatay ang dalawang miyembro ng notoryus na Akyat-Bahay Gang at isang security guard matapos sumiklab ang bakbakan sa pagitan ng magkabilang panig sa isang subdibisyon sa Upper Balulang, Cagayan de Oro City kahapon ng madaling araw.
Sa ulat ni P/Supt. Bernardo Mendoza, spokesman ng Northern Mindanao Regional PNP, bandang alas-12:30 ng madaling araw nang sumiklab ang shootout sa pagitan ng mga security guard at grupo ng kawatan sa Phase 3, Xavier Estate Subdivision sa nasabing lugar.
?Nabatid na naaktuhan ng mga nagrorondang security guard ang grupo ng kawatan habang pinapasok ang bahay ng pamilya Alpeche sa naturang subdibisyon.
Kaagad sinita ng mga guwardiya ang grupo kung saan pinaputukan ang mga ito hanggang sa mauwi sa shootout.
Kinilala ang dalawang napatay na kawatan na sina Aldemar Palconite at Ben Palconite habang nakatakas naman ang mga kasamahan.
Idineklara namang patay sa Dr. Borja Memorial Hospital ang security guard na si Alexander Busbos, 26, habang patuloy na ginagamot ang isa pang sekyu na si Geran Formeros, 32.
Narekober sa pinangyarihan ng shootout ang isang 9mm KG rifle at cal. 45 pistol habang pinaghahanap naman ng pulisya ang iba pang kasamahan ng dalawang napatay.