Cotabato, Philippines — Humabol sa Undas ang dalawa katao habang tatlo pa ang malubhang nasugatan makaraang aksidenteng mahulog sa bangin ang sinasakyan ng mga itong van sa bayan ng President Roxas, North Cotabato nitong Biyernes ng hapon.
Kinilala ang mga nasawi na sina Hilario de Juan, 33; at Jonas Trececo, 21; pawang binawian ng buhay habang isinusugod sa pagamutan.
Patuloy namang nilalapatan ng lunas sa pagamutan ang mga sugatang biktima na sina Michael Abear, 40- anyos; Porferio Napalit, 48, at Conrado Trecero, 18; mga taga Davao City.
Sa ulat ng North Cotabato Police, bandang alas-3:25 ng hapon ng mangyari ang sakuna sa bahagi ng matarik na highway ng nasabing bayan.
Ayon sa pulisya, ang van ay pag-aari ng Merryland Confectionary ay galing sa Kidapawan City at patungo sa bayan ng Antipas ng lalawigang ito.
Nawalan ng kontrol sa manibela ang driver hanggang sa bumulusok sa bangin ang behikulo. Rhoderick Benez