BULACAN, Philippines – Pinaniniwalaang dahil sa cellphone na nawala ang isa sa motibo kaya nilaslas ang tiyan at napatay ang 22-anyos na mister ng kanyang nakaalitan sa Barangay Burol 1st, bayan ng Balagtas, Bulacan kahapon ng madaling araw. Kinilala ang biktima na si Glen Richard Paglinawan ng Miraflor Subd. sa nasabing barangay habang pinaghahanap naman ang suspek na nakilala lamang sa alyas Nono. Ayon kay PO3 Robert Dilag, nakikipag-inuman ang biktima sa dalawang kaibigang sina Charles Caringal at Menard Catindig nang dumating ang suspek kung saan hinahanap nito ang nawalang cellphone. Kaagad namang lumabas ng bahay ang dalawang kaibigan ng biktima para humingi ng tulong subalit isinagawa ng suspek ang pamamaslang saka tumakas.