MANILA, Philippines - Nagbuwis ng buhay ang isang pulis matapos itong pagtatagain ng samurai ng sigang mister na pinaniniwalaang bangag sa droga sa Cabadbaran City, Agusan del Norte kahapon ng madaling araw. Sa police report na nakarating kay Caraga spokesman P/Supt. Romaldo Bayting, kinilala ang biktima na si PO3 Ferdinand Aguilar pinaghahanap naman ang suspek na si Ray Israel Cortez ng RAM compound sa Barangay VI. Nabatid na pauwi na ang biktima mula sa duty nito nang makasalubong ang suspek na may dalang samurai. Sinita ng biktima ang suspek pagsapit sa panulukan ng Asis at Garame Street subalit bigla na lamang pinagtataga at sinaksak ng samurai ng suspek ang nasorpresang pulis. Nabatid na ang suspek ay may masamang rekord sa pulisya kaugnay ng operasyon ng illegal na droga.