TUGUEGARAO CITY , Philippines - Pisak ang isang 20-anyos na mister matapos itong madaanan ng gulong ng isang truck na kanyang kasabay sa pangangarera sa kahabaan ng Provincial Road ng Brgy. Linao East sa lungsod na ito kamakalawa. Kinilala ng pulisya ang nasawi na si Anacleto Calimaran ng Brgy. Annafunan East ng nasabing lungsod. Lumalabas sa imbestigasyon na sakay ng kanyang motorsiklo ang biktima na nakikipagkarera sa truck na minamaneho ni Dante Manuel ng Gattaran, Cagayan.
Ayon sa ulat, hindi nakarkula ng biktima ang distansiya nito sa gilid ng truck na naging sanhi ng kanyang pagkakatumba sa kalsada at nagulungan ng truck. Bagamat durog ang katawan ng biktima ay nagawa pa ng driver ng truck na damputin at isugod ito sa Cagayan Valley Medical Center subalit idineklara na itong dead-on-arrival ng mga manggagamot. Napag alaman na walang lisensiya sa pagmamaneho ang nasawi habang sumuko naman sa pulisya ang suspect.