3 katao sinalvage

MANILA, Philippines - Natagpuan ng mga awtoridad ang bangkay ng tatlong lalaki na brutal na pinaslang saka itinapon ang bangkay  sa tabi ng highway ng Tagoloan, Misamis Oriental nitong Sabado ng umaga.

Bandang alas-5:45 ng umaga nang madiskubre ng mga residente ang sinunog pang bangkay ng mga biktima na  inabandona sa provincial road sa  tabi ng madamong highway ng Brgy. Sta Ana, Tagaloan ng lalawigang ito.

Ayon kay Inspector Maricris Mulat, hepe ng Tagaloan, kasalukuyan pa nilang inaalam ang pagkakakilanlan ng mga biktimang brutal na pinaslang.

Sinabi ni Mulat na posibleng sa ibang lugar pinaslang ang mga biktima saka itinapon sa lugar upang lansihin ang mga imbestigador.

Sa kasalukuyan, ayon sa opisyal, hirap pa silang kilalanin ang mga biktima dahilan halos sunog ang mukha ng mga ito.

Samantalang pawang nakaplaster ng packing tape ang bibig ng mga biktima at  nakatali ng nylon cord ang  mga leeg.

Patuloy ang imbestigasyon ng mga awtoridad sa kasong ito.