LEGAZPI CITY, Albay, Philippines — Nasa malubhang kalagayan sa pagamutan ang isang 41-anyos na mister matapos itong pagbabarilin makaraang maningil ng pautang sa mga suspect, kamakalawa ng hapon sa Brgy. Luy-a, Aroroy, Masbate. Nakilala ang biktima na isinugod sa Masbate Provincial Hospital na si Richard Francisco, 41, residente ng Brgy. Jaboyoan ng naturang bayan. Samantala, ang mga suspek naman na nagsitakas papalayo sa lugar ay kinilalang sina Janjan Rabosa at Kling-Kling Medina at isa pang di-nakikilalang suspek.
Batay sa ulat ng pulisya, ang insidente ay naganap dakong alas-4:00 ng hapon nang magtungo ang biktima sa bahay ng suspek na si Janjan upang singilin nito si Kling-Kling sa utang. Gayunman, ikinagalit umano ng suspect ang ginawang paniningil sa kanya ng biktima kaya kaagad itong nagbunot ng baril at pinaputukan ang huli. Matapos ang ginawang pamamaril ay mabilis na nagsitakas papalayo ang mga suspect dala ang ginamit na baril.