6-anyos totoy lasog sa bus

MANILA, Philippines - Nagkalasug-lasog ang katawan ng 6-anyos na totoy makaraang masagasaan at makaladkad ng pampasaherong bus sa kahabaan ng highway sa Purok San Isidro, Barangay Poblacion, bayan ng San Pablo, Zamboanga del Sur kamakalawa ng hapon. Sa police report na isinumite sa Camp Crame, bumabagtas ang pampasaherong bus (JVC 788) na minamaneho ni Michael Puyos nang biglang magtatakbong tumawid sa highway ang nagla­larong biktimang si Jaylord Abanales. Eksakto namang paparating na ang bus kaya  nahagip ang bata kung saan minalas pang makaladkad ng ilang metro. Isinailalim na sa kustodya ng San Pablo PNP ang driver ng bus kaugnay ng kasong kriminal na kinakaharap nito sa pagkamatay ng biktima.