DINALUPIHAN, Bataan , Philippines – Halos maligo sa sariling dugo ang isang babae makaraang burdahan ng saksak ng kanyang live-in partner sa loob ng inuupahan nilang bahay sa Brgy. San Pablo bayang ito kamakalawa.
Nakilala ang biktima na si Ma. Fe Gallo, 30, tubong CanlaÂlay, Biñan City, Laguna at pansamantalang naninirahan sa nabanggit na lugar.
Base sa salaysay ni Rick, kapatid ng biktima, bago ang krimen ay narinig niya na nagtatalo ang kanyang kapatid at ang live-in partner nito sa ikalawang palapag ng gusaling kanyang pinagtatrabahuhan.
Nang tumahimik na ay umakyat si Rick para alamin ang insidente kung saan nakita niyang duguang nakahandusay ang kanyang kapatid. Pinaniniwalaang nagsaksak din sa sarili ang suspect na si Jonathan Reyes, 32, ng Sta. Rosa, Nueva Ecija.
Tadtad ng saksak sa iba’t ibang parte ng katawan ang biktima na siya nitong ikinamatay, habang nasa Intensive Care Unit sa isang ospital ang suspect.
Inihahanda ng mga awtoridad ang isasampang kasong murder laban sa suspect.