NORTH COTABATO , Philippines - Napatay ang 37-anyos na lalaki na sinasabing nakipagtalo sa kanyang kainuman sa isyung boksing makaraang pagbabarilin sa Sitio Tumpok, Barangay Poblacion, bayan ng Libungan, North Cotabato kahapon ng umaga. Kinilala ni P/Chief Inps. Bernard Tayong, hepe ng Libungan PNP ang biktima na si Kamad Masaya ng Tinimbakan, Banisilan habang sumuko naman sa pulisya ang suspek na si Kadil Alimaw Pananggalan, 65, ng Sitio Tumpok. Sa inisyal na pagsisiyasat ng pulisya, lumalabas na magkasamang nag-iinuman ang dalawang magkaibigan nang magkapikunan sa pinagtatalunang laban ng boksing. Nagalit ang suspek kaya pitong beses na pinagbabaril ang biktima gamit ang cal.45 pistol.