TUGUEGARAO CITY, Philippines - Nabingwit ng mga mangingisda ang naagnas na bangkay ng isang 10 anyos na nene na pinaghihinalaang ginahasa at pinatay ng kanyang sariling kaanak sa isang sapa sa Brgy. Barucboc, Quezon, Isabela kamakalawa.
Sinabi sa PSN ni Sr. Insp. Jhun-Jhun Balisi, hepe ng pulisya ng Quezon na ang bangkay ni Divina Panis na nawawala pa noong Abril 9 ay kinilala ng kanyang ina matapos itong mabingwit ng mga mangingisda sa sapa. Ang bangkay ay nakasilid na sa isang sako at isasailalim pa sa pagsusuri ng Scene of the Crime Operatives (SOCO) kung ito ay inabuso at sa anong pamamaraan ito pinatay dagdag ni Balisi. Una dito ay isang kaanak mismo ng bata ang isinailalim ng pulisya sa imbestigasyon dahil ito ang sinasabing huling nakitang kasama ng biktima bago ito nawala.
Patuloy ang imbestigasyon ng pulisya sa kaso.