MANILA, Philippines - Tatlo-katao kabilang ang 9-anyos na totoy ang namatay matapos na matabunan ng gumuhong bundok sa magkahiwalay na landslide dulot ng patuloy na pagbuhos ng ulan sa Agusan del Sur kamakalawa.
Sa ulat na nakarating kay PNP regional spokesman P/Supt. Martin Gamba, naunang nilamon ng landslide ang biktimang si Ceferino Garcia, 62, ng Purok Loring Bentilasion, Sitio Tinago sa Brgy. Sta Cruz, bayan ng Rosario.
Bandang alas-7:30 ng umaga nang matabunan ng gumuhong bundok ang matanda habang tinatangka nitong iligtas ang anak na lalaki na nagmimina ng ginto sa bulubunduking bahagi.
Natabunan din ng gumuhong lupa ang minerong si Isagani Depillo sa Brgy. Sta Cruz.
Samantala, patay din ang 9-anyos na si Dominick Hatico matapos matabunan ng gumuhong bundok ang kanilang tahanan sa Barangay Tinago, bayan ng Bunawan.
Nabatid na natutulog ang bata sa kanilang bahay habang naghahanda naman ng almusal ang pamilya nito nang sumalakay si kamatayan.
Nakaligtas ang pamilya ng batang naiwan matapos magtakbuhan ang kaniyang mga magulang at kapatid sa tindi ng malakas na dagundong bago ang landslide.