Principal kinatay

 MANILA, Philippines - Brutal ang sinapit na kamatayan ng isang  elementary school principal matapos itong pagsasaksakin ng hindi pa nakilalang mga salarin  sa loob ng tahanan nito sa Brgy. Lanao Kuran, Arakan, North Cotabato nitong Biyernes ng gabi.

Idineklarang dead-on- arrival sa Arakan District Hospital sa tinamong mga saksak sa iba’t-ibang bahagi ng katawan ang biktimang kinilalang si Renato de Pedro, principal sa Lanao Kuran Elementary School sa nasabing bayan.

Sa ulat na ipinarating sa Camp Crame ni Cotabato Provincial Police Office (PPO) Director P/Sr. Supt. Danilo Peralta, naganap ang krimen sa lugar dakong alas-8:40 ng gabi.

Ayon sa inisyal na imbestigasyon, bago ito ay pinagbabato umano ng ilang kalalakihan ang bahay ng biktima.

Ilang saglit pa ay puwersahan ng pinasok ng mga salarin ang tahanan ng biktima saka pinagtulungan itong pagsasaksakin.

Nanawagan naman ang mga awtoridad sa mga posibleng testigo sa krimen na nakakita sa mga suspek na makipagtulungan sa mga awtoridad para sa agarang ikareresolba ng kaso.