BULACAN, Philippines – Aabot sa P.5 milyong cash ang nalimas sa mag-asawang trader makaraang holdapin ng mga di-kilalang lalaki na lulan ng dalawang motorsiklo sa kahabaan ng highway sa Barangay Tabang, bayan ng Plaridel, Bulacan kahapon. Kinilala ng pulisya ang mag-asawa na sina Henry Bordallo, 63; at Cecilia Bordallo, 61, kapwa nakatira sa nasabing barangay. Base sa police report, papauwi na ang mag-asawang negosyante lulan ng Honda Civic (ZSY-673) matapos mag-withdraw ng malaking halaga sa banko nang harangin at ratratin ng mga armadong lalaki na sakay ng dalawang motorsiklo pagsapit sa nasabing barangay. Tinangkang manlaban ni Henry matapos hablutin ng isa sa mga holdaper ang kanyang bag na naglalaman ng pera subalit pinagbabaril siya nito.