NORTH COTABATO, Philippines - Dalawang kawani ng gobyerno ang iniulat na namatay makaraang sumalpok ang kanilang motorsiklo sa kasalubong na van sa kahabaan ng highway sa bayan ng Matalam, North Cotabato kahapon ng umaga. Kinilala ni P/Senior Insp. Elias Colonia, hepe ng Matalam PNP ang mga biktima na sina Francis Bello, Jr., at Doris Ann Andum, kapwa kawani ng Office of Southern Cultural Communities (OSCC) ng Autonomous Region in Muslim Mindanao (ARMM). Ayon sa police report, pumutok ang unahang gulong ng motorsiklo ni Bello kaya inakupa ang kabilang linya kaya sumalpok sa kasalubong na van. Dead-on-the-spot si Andum habang namatay naman si Bello habang ginagamot sa Cotabato Provincial Hospital. Nabatid na magsusumite sana ng ilang dokumento ang mga biktima para sa PAGIBIG loan sa Kidapawan City nang makasalubong si kamatayan.